ADA Universitetinin Qazax Mərkəzi “Bir Müəllimin Manifesti” ixtisasartırma proqramına 2023-2024-cü tədris ilində iştirak üçün qəbul elan edir

Qazax Müəllimlər Seminariyası/ADA Universitetinin Qazax Mərkəzi “Bir Müəllimin Manifesti” ixtisasartırma proqramına 2023-2024-cü tədris ilində iştirak üçün sənəd qəbulu elan edir.

“Bir Müəllimin Manifesti” ixtisasartırma proqramı yerli və xarici professor-müəllim heyəti tərəfindən həyata keçiriləcəkdir. Dərslər Azərbaycan və ingilis dillərində tədris olunacaqdır.

İxtisasartırma proqramı Qazax Müəllimlər Seminariyasında/ADA Qazax Mərkəzində, ADA Universitetində və ADA Universitetinin Vaşinqton Mərkəzində əyani və onlayn formada aparılacaqdır. Aşağıda qeyd olunmuş dərslər cari ilin oktyabr ayından başlayaraq ayda 2 həftəsonu (4 tam gün) əyani şəkildə, digər vaxtlar isə ADA Universitetinin "Blackboard" öyrənmə platforması üzərindən onlayn həyata keçiriləcəkdir:

1. Akademik məqsədlər üçün İngilis dili (English for Academic Purposes)

2. Müasir Təlim və Tədrisin Əsasları (Fundamentals of Contemporary Teaching and Learning)

3. Tədris proqramının təşkilində yaradıcı yanaşma (Creative Course Design)

4. Təhsil layihələrin hazırlanması (Project design in education)

Dərslər oktyabr ayında başlayacaq.

Vaşinqton Mərhələsi

Proqramın ABŞ-da keçiriləcək hissəsinin 4-5 həftə müddətinə tamamilə əyani və ingilis dilində 2024-cü ilin fevral - mart ayında keçirilməsi nəzərdə tutulmuşdur (fevral-mart və ya aprel-may).

Bu müddət ərzində proqram iştirakçıları yuxarıda qeyd olunan dərslərdən əlavə,  ADA Universitetinin Vaşinqton Mərkəzində təşkil olunacaq seminar, mühazirə və konfranslarda iştirak edəcək, müxtəlif yerli məktəb, kollec və universitetlərə səfər edəcəklər. Həmçinin, iştirakçılar Vaşinqtonda keçirilən tədbirlərdə iştirak edəcək, muzey və mədəniyyət mərkəzlərini də ziyarət edəcək, ingilis dilini təkmilləşdirəcək və ABŞ-ın qabaqcıl təhsil sistemi ilə yaxından tanış olacaqlar.

Təlim proqramını uğurla başa vuran iştirakçılar sertifikatla təltif olunacaqlar.

İştirak üzrə tələblər və seçim meyarları:

• Bakı və Sumqayıt şəhərləri istisna olmaqla, Azərbaycanın digər şəhər və rayonlarında işləyən orta məktəblərin müəllim və direktorları;
• Minimum 3 (üç) il fənn sahələrinin tədrisində pedaqoji təcrübəsi olan orta məktəb müəllim və direktorları;
• Namizədlərin ingilis dili bilikləri orta səviyyədə (intermediate) olmalıdır. İngilis dili biliklərini təsdiq edən minimum TOEFL 44-49/ IELTS 5/ Duolingo 75 beynəlxalq imtahan nəticələri olanlar müvafiq sənədi təqdim etməlidirlər. Namizədlərin ingilis dili səviyyəsi müsahibədən sonrakı mərhələdə ehtiyac olduğu halda, ADA Universitetinin İngilis Dili proqramının keçirdiyi test vasitəsilə də müəyyən edilə bilər.

Namizədlərin və proqram iştirakçılarının seçim prosesi:

• Namizədlərin müraciət ərizə formaları ilkin mərhələdə dəyərləndiriləcəkdir.
• İkinci mərhələdə seçim onlayn müsahibə (İngilis dilində) əsasında aparılacaqdır.

Proqramın ABŞ komponentinə seçim 3 meyardan ibarətdir:

1. Yerli proqramda və xüsusilə yekun ingilis dili imtahanında yüksək göstəricilər nümayiş etdirən iştirakçılar;

2. Müsahibə mərhələsindən uğurla keçən iştirakçılar;

3. Yekun qərar proqramda tədris aparan müəllimlər və proqram rəhbərlərindən ibarət müsahibə komitəsinin rəyləri əsasında veriləcəkdir.

Tələb olunan sənədlər:

1. Onlayn Ərizə forması 

2. Şəxsiyyət vəsiqəsinin surəti

3. İngilis dili sertifikatları (əgər varsa)

4. Aidiyyatı təlim sertifikatları (əgər varsa)

Sənədlər 04 sentyabr 2023-cü il tarixinədək qəbul olunacaq. Əlaqə üçün: bmm@ada.edu.az  

Qeyd: Onlayn ərizəni tam doldurmayan namizədlərin müraciətinə baxılmayacaq.

ADA Universiteti sınanmış təcrübəsini regionlarla bölüşməkdən qürur duyur və Azərbaycan Respublikasında təhsilin inkişafına öz töhfəsini verməyə hazır olan namizədləri gözləyir.